Қазақстан құрамасы волейболды отырып ойнаудан Азия чемпионы атанды

Бүгін, 14 маусымда, волейболды отырып ойнаудан өткен Азия чемпионатының финалында Қазақстан ұлттық құрамасы Қытай командасын 3:2 есебімен жеңіп, өз тарихында алғаш рет Азия чемпионы атанды, деп хабарлайды Zakon.kz.

ҚР Туризм және спорт министрлігінің хабарлауынша, чемпионат барысында Қазақстан құрамасы іріктеу кезеңінде Сауд Арабиясы, Жапония және Аустралия командаларын, ал жартылай финалда Таиланд құрамасын 3:0 есебімен сенімді түрде жеңіп, финалға жолдама алған болатын.

Чемпионат қорытындысы бойынша бірінші орынды Қазақстан, екінші орынды Қытай және үшінші орынды Таиланд құрамасы иеленді.

Сондай-ақ чемпионат барысында жоғары шеберлік көрсеткен ұлттық құраманың бірнеше ойыншысы жеке марапаттарға ие болды. Эрик Қасқабаев – үздік доп беруші, Шыңғыс Медеуов – үздік либеро, ал Алмат Оспанов – үздік блок қоюшы атанды.

"Чемпионаттық ақтық жарысы тартысты өтті. Қарсыластарымыз осал болған жоқ. Финалдық кездесудің алғашқы екі сетінде алаң иелері – Қытай құрамасы басымдық танытты. Алайда ұлттық құрамамыз керемет ерік-жігер мен шеберліктің арқасында келесі үш сетте басым түсіп, тартысты ойында тарихи жеңіске қол жеткізді. Бұл – Қазақстан үшін Азия чемпионатындағы алғашқы алтын медаль. Жарысқа дайындық барысында қолдау білдірген серіктестеріміз — Citi, Sport Qory, “Самұрық-Қазына” АҚ және басқа да демеушілерге алғысымызды білдіреміз", – деді ұлттық құраманың бас жаттықтырушысы Бауыржан Тахауов.

Айта кетейік, волейболды отырып ойнаудан Азия чемпионаты 6–15 маусым аралығында Қытайдың Ханчжоу қаласында өтті. Жарысқа 8 ерлер және 7 әйелдер ұлттық командасы қатысты. Чемпионаттың нәтижесі бойынша Қазақстан мен Қытай құрамалары 2026 жылы Қытайда өтетін әлем чемпионатына жолдама ұтып алды.

Бұған дейін Қазақстандық дзюдошы Әбиба Әбужақынова Венгрияның Будапешт қаласында өтіп жатқан әлем чемпионатында күміс медаль иеленгенін жазғанбыз.