Дэвис кубогы: Бейбіт Жұқаев та жеңіске жетіп, Қазақстан қоржынына бір ұпай салды

Астана қаласында Дэвис кубогы Бірінші әлемдік тобында Қазақстан мен Пәкістан арасында өтіп жатқан плей-офф матчында екінші болып кортқа шыққан Бейбіт Жұқаев та елімізге жеңіс сыйлады, деп хабарлайды Zakon.kz.

Турнир шымылдығын түріп, жеңіске жеткен Александр Шевченкодан кейін әлемнің 230-ракеткасы Бейбіт Жұқаев кортқа шықты.

Жерлесіміз пәкістандық Хузайфа Абдул Рехманмен өзара шеберлік байқасты.

Тартысты кездесу екі сеттен тұрып, 1 сағат 19 минутқа созылды. Есеп: 7:5, 6:0. Жеңіс Қазақстан еншісінде.

Осылайша, Қазақстан құрамасы 2:0 есебімен суырылып алға шықты.

Ертең, жексенбі күні Қазақстан — Пәкістан құрамалары арасында тағы үш ойын белгіленген. Қазақстандықтарға енді бір кездесуді жеңіспен аяқтаса, осының өзі жетіп жатыр.

Бұған дейін Дэвис Кубогын сарапқа салған белді турнирді Александр Шевченко сәтті бастағанын жазғанбыз.