Ақтөбеде жеке университеттің оқудан шығарылған 350 студенті оқуын қайта жалғасырмақ

Ақтөбеде оқудан шығарылған Қазақ-Ресей Халықаралық университетінің 350 студенті оқуын жалғастыра алады, деп хабарлайды Zakon.kz.

"Жетінші арна" ақпаратынша, бұл туралы өңірге тексеріспен келген Ғылым және жоғары білім министрлігі комитеті төрағасының орынбасары Ақерке Абылайхан айтты.

Оның айтуынша, оқудан шығару заңсыз болған. Бірыңғай базада оқудан шығарылғаны туралы мәлімет енгізілмеген. Сонымен қатар бұйрық тек орыс тілінде ғана. Бұл – нормативтік-құқықтық құжаттың ережесіне қайшы.

"Құқықтық негізде құжаттардағы қарама-қайшылықтарды көріп отырмыз. Министрлік тарапына арнайы тексеру жүргізіледі. Бақылау комитеті бар. Сондықтан бүгінгі таңда студенттердің статусы сақталады". Ақерке Абылайхан, ҚР ҒЖЖБМ Комитеті төрағасының орынбасары

Бұған дейін Алматыда мейрамханада шыққан ірі өрт сөндірілгендігі хабарланған болатын.