Абай облысының әкімі Берік Уәли өңір халқына үндеу жасады

Абай облысының әкімі Берік Уәли 2025 жылғы 4 сәуірде өңір тұрғындарына бейнеүндеу жазды, деп хабарлайды Zakon.kz.

Ол Абай облысы ұлы тұлғаның атымен аталған, алаш арыстарының ізі қалған тарихы терең, табиғаты көркем өңір екенін айтты.

"Бұл – біздің ортақ үйіміз. Оны таза, жайлы, көрікті етіп ұстау – әрқайсымыздың азаматтық борышымыз.Шын мәнінде, біздің аймақ тоғыз жолдың торабында тұр. Ертістің екі жағасын жалғаған жалғыз көпірден екі алып көршімізге қарай көлік ағыны өтеді. Бұл тұрғыдан алғанда Семейіміз аймақтық көлік-логистикалық хабқа айналып келеді. Бұл бізге үлкен мүмкіндік бергенімен, зор жауапкершілік те жүктейді. Шаһарымыздың тазалығы мен аймағымыздың абыройы сыналатын да осы тұс. Аймақ экономикасы, өнері мен мәдениеті, экологиясы мен тазалығы – баршамызға ортақ. Ал тазалық дегеніміз – жылына бір рет сенбілікке қатысу емес, бұл – біздің өңірде қалыптасуы тиіс үлкен мәдениет",- деді ол.

Әкім сөзін жалғастыра келіп, мемлекет басшысы Қасым-Жомарт Кемелұлы Тоқаевтың "Қалалар мен ауылдардың сәулетті, саябақтар мен ауланың таза болуы, ең алдымен, басқаға емес, өзімізге керек", деген сөзін негізге алды.

"Туған жеріміздің түлегені, тұрған ортамыздың кіршіксіз болғаны, ең алдымен, өзімізге керек. Облысымыздың тазалығы – әкімдік пен коммуналдық қызметтің ғана емес, әрбір азаматтың, әрбір отбасының жауапкершілігі. Бір-бірімізге жанашырлықпен, қоршаған ортаға қамқорлықпен қарамасақ, күнделікті жүретін көшелерімізді, балаларымыз ойнайтын аулаларымызды сырттан келіп ешкім тазалап бермейді. Осы мақсатта Президентіміздің бастамасымен қолға алынған "Таза Қазақстан" бағдарламасы аясында біз облысымызда жалпыөңірлік сенбілікті бастағалы тұрмыз. Бірақ бұл бір реттік акция емес, жыл бойы жалғасатын жақсы дәстүрге айналуы тиіс".Берік Уәли

Ол астаманың баянды болуына септігі тиер деген ниетпен байқау жарияланғанын және келесі номинациялар бойынша шынайы жанашыр жандарды анықтайтынын айтты.

• "үздік аудан",
• "үздік ауыл",
• "үздік аула",
• "үздік университет",
• "үздік колледж",
• "үздік мектеп",
• "үздік балабақша",
• "үздік көше",
• "үздік мекеме".

"Әрине, жеңімпаздарға қомақты сыйлықтар да тағайындалады".Берік Уәли

Сондай-ақ, ол туған жеріміздің тазалығы үшін жұмылу әрқайсымыздың перзенттік парызымыз екенін еске салды.

Бұл ретте, Берік Уәли биыл аймағымыз атын иеленген ұлы Абайдың 180 жылдығы екенін атап өтті.

"Президентіміз айтқандай, бұл мерейтойды лайықты деңгейде атап өтуіміз керек. Біз бір қолдың саласындай, бір үйдің баласындай бірігіп, бұл шараны жақсы атқаруға тиіспіз. Бірлік танытатын тұстың бірі – осы сәт, ағайын. Себебі біз еліміздің түкпір-түкпірінен келетін қонақтарға көркем де, таза қаламызды ұялмай көрсете алуымыз керек",- деді ол.

Бұған дейін Қазақстанда зергерлік бұйымдарды сатудың жаңа ережелері әзірленгені хабарланған болатын.