Сырттанов ауылында мал ұрлығы мәселесі шешілді

22:06, 29 мамыр 2020
284

Алматы облысының Ақсу ауданы тұрғындарының негізгі күнкөріс көзі - мал шаруашылығы. Табиғаты да, ауа-райы да кез-келген малды өсіруге қолайлы. Аудандағы шаруа қожалықтарының басты проблемаларының бірі – мал ұрлығы болған, деп хабарлайды zakon.kz Алматы облысы ПД баспасөз қызметіне сілтеме жасап.

Мал ұрлығын ашуға және оның алдын алуға бағытталған кешенді шаралар арқасында тәртіп сақшылары биыл мал ұрлығын ашу көрсеткішін жақсартып, оның орын алуына жол бермеуде. Аудандағы Б. Сырттанов атындағы ауылда биыл мал ұрлығы мүлдем тіркелмеген. Ауыл әкімдігі мен учаскелік полиция инспекторы және ауыл тұрғындары бірлесіп, мал ұрлығының ғана емес, кез келген құқық бұзушылықты болдырмау мақсатында күш біріктірген. Нәтижесінде Алаш арысының атын иеленген ауыл биыл бірде-бір әкімшілік хаттама да толтырылмаған тәртіпті елдімекен атанып отыр.

"Биыл ауданда мал ұрлығына қатысты жиырмадан астам қылмыс, яғни мал ұрлығының 89 пайызы ашылды. Сонымен қатар, бұрынғы жылдары орын алған 10 жуық дерек әшкереленді. Біз мал ұрлығының алдын алуға бағытталған кешенді шараларды қолға алдық. Б. Сырттанов атындағы ауылдың кіреберісінде бейнебақылау камералары орнатылды. Ауылға келген және кеткен көліктерді тәулік бойы жазатын камера ауылдық учаскелік полиция инспекторының ұялы телефоны арқылы да бақыланады. Сонымен қатар, ауыл жастарының қатарынан атты жасақ құрылып, ауыл маңын түнгі патрульдеу ұйымдастырылуда. Осының арқасында аталған елдімекенде бірде-бір мал ұрлығы тіркелген жоқ", - деді Ақсу ауданы Полиция бөлімінің бастығы полиция подполковнигі Әділмұрат Байзолда.

Аудандық полиция басшысының айтуынша, өзіне тапсырылған учаскеде құқық бұзушылықты түбегейлі жеңген полиция капитаны Ұлан Мұқатаев ҚР Ішкі істер министрінің құрмет грамотасын иеленіп, үздік учаскелік полицей атанған.

"Ауданда үш мыңға жуық шаруа қожалығы және оларда 89 000 ірі қара мен 27 мыңнан астам жылқы бар. Жергілікті билік пен полиция тарапынан шаруа қожалық иелеріне түсіндіру жұмыстары жүргізіліп, мал ұрлығының алдын алу шаралары қабылдануда. Ауыл тұрғындары мен шаруаларға малдарын қараусыз жіберудің қауіпті екені түсіндірілуде. Ал, малдырының жоғалғанын білген сәтте тұрғындар уақыт жоғалтпай полиция хабар беру қажет екенін түсінгені абзал. Өйткені, шұғыл қабылданған шаралар барымташыларды ұстауға мүмкіндікті арттыратыны анық", - деп толықтырды полиция подполковнигі Әділмұрат Байзолда.


Источник: zakon.kz


Подписывайтесь на наш Telegram-канал. Будьте в курсе всех событий!
Мы работаем для Вас!

Пікір