«Қазақ қазақты сатқан» деген түсініктен арылуымыз керек - Бүркіт Аяған

"Қазақ қазақты сатқан" деген қасаң пікірден құтылуымыз керек. Тарихшы Бүркітбай Аяған санадағы "тазалық жұмысы" осындай қалыпқа әкелуі керектігін айтады, деп хабарлайды "Хабар 24".

Оның айтуынша, Президенттің тапсырмасымен құрылатын мемлекеттік комиссия тарихты түгендеумен қатар, бұрмаланып жеткен деректерді түзетумен айналысуы керек.

Жаңағыдай әңгімелерді Кеңес Үкіметінің жендеттері ел ішіне іріткі салу үшін әдейі айтқызған, - дейді тарихшы. Сондықтан теріс идеологияның тамырына балта шабылуы қажет.

Бүркітбай Аяған , Мемлекет тарихы институтының директоры:

– Біз қазақты кінәлап, қазақты сатқын деп көрсету – бұрынғы тоталитарлық жүйенің, оның арасында КГБ мен НКВД-ның айтып жүрген әңгімелері. Мысалы, қазақ әлсіз халық, қолынан түк келмейді деп айтады. Жабайы екен, не қала сала алмайды, не мәдениет құра алмайды дегеннің барлығы идеологиядан шыққан. Бұл Кеңестік партияда айтылады. Сондықтан елге қаратып сөйлегенде, байқап сөйлеу керек.