Дулат Бекбауов Азия чемпионатын сенімді жеңіспен бастады

Бүгін, 30 қарашада Таиланд Корольдігінің Чиангмай қаласында Азия чемпионатының алғашқы жекпе-жектері өтті, деп хабарлайды Zakon.kz.

ҚР Туризм және спорт министрлігі Спортты дамыту дирекциясының баспасөз қызметінің хабарлауынша, 67 келіде әлем чемпионатының күміс жүлдегері Дулат Бекбауов 1/8 финалда Тайпей спортшысы Джиа-Джун Чиуан Вангпен қолғап түйістірді.

"Бойы қарсыласынан қарағанда ұзын жерлесіміз айқасты қашықтықтан бақылап, алға ұмтылған Тайпей өкілінің қателігін тиімді пайдаланды. Есеп: 5:0", делінген ресми хабарламада.

Айта кетсек, бұған дейін жарыс бастала салысымен Қазақстан боксшылары алты медальға таласу құқығына ие болғанын жазған болатынбыз.

Азия чемпионаты 29 қараша мен 11 желтоқсан аралығында Чианг Мэйде (Таиланд) өтеді.