Алматыда полиция қарақшыларды ұстады

Полиция қызметкерлері Алматының Алмалы ауданында қарақшыларды ұстады, деп хабарлайды Zakon.kz.

Екі жас жігіт өтіп бара жатқан адамға шабуыл жасап, зорлық-зомбылықпен қорқытып, оны несие алуға мәжбүрлеген және ақшаны иемденген.

"Қарақшылық дерегі бойынша сотқа дейінгі тергеу амалдары жүргізілуде. Екі күдікті де қамауға алынды. Олардың осыған ұқсас бірнеше қылмыстық эпизодтарға қатысы бар екендігі белгілі болды. Осыған байланысты, күдіктілердің жеке басы мұқият тексерілуде. Сондай-ақ тергеу аясында ұрланған мүлікті жәбірленушілерге қайтару жұмыстары жүргізілуде", – дейді Алмалы аудандық ПБ-на қарасты полиция бөлімінің басшысы Батұржан Абдумасаров.

ҚР ҚК-нің 201-бабына сәйкес өзге ақпарат тергеу мүддесіне орай жария етілмейді. ҚР Конституциясының 77-бабы 3-бөлімі 1-тармағы, ҚР ҚК-нің 19-бабы 1-тармағына сай кез келген азамат сот шешімі заңды күшіне енгенге дейін кінәсіз деп саналады.