СҚО-дан Қытайға ұн және май экспортталады

Алматы. 12 шілде. 7kun.kz – Солтүстік Қазақстан облысынан
Қытайға және басқа да елдерге ұн және май экспортталады.

Облыстық ауыл шаруашылығы басқармасынан хабарлауынша, Ғабит Мүсірепов ауданында жылына 5 мың тонна ет өндіретін бройлерлік құс фабрикасының құрылысы жүріп жатыр.

«Жобаның құны 1,5 млрд теңге, оны 2020 жылға дейін іске қосу жоспарланып отыр», – деп түсіндірді ведомствода.

Осы жылдың соңына дейін жұмыс істеп тұрған терең өңдеу өнімдері мен ұн өндіру кәсіпорнында биоэтанол шығару цехын іске қосу жоспарлануда.

«Іске қосылатын жобаның қуаттылығы жылына 36 мың тонна өнімді құрайды. Жалпы кәсіпорын ағымдағы уақытта жылына 39 мың тонна крахмал, 10 мың тонна балауыз, 61,8 мың тонна ұн және 41 мың тонна жем-шөп өнімдерін өндіреді», — деп қосты басқармада.

Ведомствода атап өткендей, жыл соңына дейін 18 мың тонна крахмал және 5 мың тоннадан астам балауыз шығару күтілуде. Дайын өнім тек ішкі нарыққа ғана емес, Өзбекстанға да жеткізіледі.

Сондай-ақ, 2019 жылдың мамыр айында құрама жем өндіру үшін бидай өңдеу зауыты іске қосылды. Оның қуаттылығы жылына 360 мың тонна өнім. Бұған дейін индустриялық-инновациялық даму басқармасының мәліметінше, барлық тауар Қытайға жеткізілетіні белгілі болды.

Сонымен қатар, Тайынша ауданында өсімдік майы мен күнжара өндіретін кәсіпорын Қытай, Ресей және Иранға өнімдерді экспорттайды.

«Жобаға қытайлық «Айцзю» компаниясы инвестициялады. Қуаты жылына 365 мың тоннаны құрайды. 2019 жылдың соңына дейін Қытайға 30 мың тонна өсімдік майын жеткізу жоспарланып отыр», – деп хабарлады басқармада.

Источник: 7kun.kz